Голландиядаги Wageningen университети маълумотларига кўра қанча миқдордаги гўнгдан қанча миқдор энергия олиш ҳисоблаб чиқилди. Олимлар ўртача бир соғин сигирдан йилига 27 куб метр гўнг чиқиши ҳисоблаб чиқишган. Бу миқдордан олинган метан кичик тежамкор автомобилнинг 9 минг километр йўл босиб ўтиши учун етарли.

Буюк Британия мутахассислари қорамол гўнгида ишлайдиган трактор ишлаб чиқишди. Мутахассислар тракторга метанни минус 162 даража ҳароратда суюқ ҳолатда ушлаб турадиган криоген резервуар ўрнатишди. Бундай тракторнинг кучи 270 от кучига тенг ва унинг ишлаши дизель машиналари билан бир хил. Тракторга тўғридан-тўғри далада ёқилғи қуйиш мумкин.

Ишлаб чиқувчилар уларнинг технологиясини кенг жорий этиш углерод чиқиндиларига қарши курашда ёрдам беришини таъкидлашмоқда. Биоёқилғи ёрдамида дунёдаги энг йирик энергетика компанияларидан бири - Чеврон углерод чиқиндиларига қарши курашни бошлаган.

Финляндияда автомобиллар бакини биогаз билан тўлдирадиган ёқилғи қуйиш шохобчаси (заправка) мавжуд. Финляндияда 180 та фермер хўжалигига эга бўлган Валио компанияси билан ҳамкорлик қилувчи Вуоренмаа оиласи 2005 йилдаёқ гўнгдан биогаз ишлаб чиқаришни бошлаган. Фермерлар ёқилғидан ўз эҳтиёжлари учун фойдаланган, фермани иссиқлик ва электр энергияси билан таъминлаган. Валио фермер хўжаликларида ҳозирда гўнгдан биоёқилғи ишлаб чиқарадиган завод ишлайди. Маҳсулот етказиб берувчи Валио юк машиналари ҳам биогазга ўтмоқда. Компания ўз олдига 2035 йилгача углерод изини нолга тенглаштириш мақсадини қўйган.

Ривожланган мамлакатларда фермалар ва бошқа шу каби объектлардан метан олиш технологияси анчадан бери мавжуд бўлиб келган, бироқ ҳозирда шаҳарлар ва корхоналарнинг чиқиндиларни камайтириш йўллари изланаётгани учун бу йўналиш катта эътиборни тортмоқда. Чеврон ва бошқа нефть компаниялари биоёқилғи глобал исишга қарши курашда ёрдам беришига бир йўл сифатида қарайди.